|
 Martın
13-də Təhsil Nazirliyinin Sağlamlıq imkanları məhdud
uşaqlar üçün 5 nömrəli internat məktəbində "Fitnə", "Şah
və xidmətçi" və "Humayın yuxusu" adlı cizgi filmlərinin
təqdimatı keçirilib.
Təhsil Nazirliyi, Bakı Şəhər İcra Hakimiyyətinin dəstəyi
ilə Bakı Şəhər Kino Xidməti İdarəsi və Gözdən Əlillər
Cəmiyyəti tərəfindən "Sərhədsiz kino" layihəsi
çərçivəsində hazırlanmış bu filmlər görmə və eşitmə
imkanları məhdud uşaqların başa düşməsi üçün tiflo və
surdo şərhləri ilə təmin olunub.
Təqdimat mərasimində Təhsil, Mədəniyyət və Turizm,
Gənclər və İdman, Rabitə və Yüksək Texnologiyalar,
Səhiyyə nazirliklərinin, Ailə, Qadın və Uşaq Problemləri
üzrə Dövlət Komitəsinin, Ombudsman Aparatının, Nərimanov
Rayon İcra Hakimiyyətinin nümayəndələri iştirak ediblər.
Cizgi filmlərinin təqdimatından sonra məktəbin istedadlı
uşaqlarının ifasında bədii proqram nümayiş olunub.
Proqramın aparıcıları Novruz bayramı münasibəti ilə
tədbir iştirakçılarını təbrik edərək xalqımızın
müqəddəs bayramlarından olan Novruz adət-ənənələrindən
danışıblar.
Şagirdlərin təqdim etdikləri bütün nömrələr, xüsusən də
Bahar qızın meydana gəlişi, təmsil etdiyi fəslin şəninə
söylədiyi şeir və mahnılar, Keçəllə Kosanın məzəli
dialoqu, ayrı-ayrı şagirdlərin ifaları, yumurta
döyüşdürmələri, idman nömrələri bayram iştirakçılarında
xoş ovqat yaradıb.
Rəşad RAMAZANOĞLU,
"Azərbaycan müəllimi" |
