|
 İyunun
12-də Naxçıvan Özəl Universitetində "Heydər Əliyev və
Azərbaycan" mövzusunda "Heydər Əliyev" lektoriyasının
növbəti məşğələsi keçirilib. Məşğələni giriş sözü ilə
ali təhsil ocağının rektoru, professor İsmayıl Əliyev
açıb.
Sonra universitetin humanitar elmlər kafedrasının
müəllimi, tarix üzrə fəlsəfə doktoru, dosent Elçin
Zamanovun "Heydər Əliyev və Azərbaycan" mövzusunda
məruzəsi dinlənilib. Bildirilib ki, ulu öndər millətin
gələcəyinin elm və təhsillə bağlı olduğunu bildirərək
respublikaya rəhbərlik etdiyi ilk gündən bu sahənin
inkişafını vacib məsələ kimi ön plana çəkmişdir. Çünki
Heydər Əliyevin elm və təhsil sahəsində apardığı
islahatlar elə bir mərhələyə təsadüf edirdi ki, bu
dövrdə Azərbaycanda milli kadrlar az idi. Məhz ümummilli
lider Heydər Əliyev uzaqgörən və müdrik siyasətinin
nəticəsində güclü kadr potensialı yaratmaqla milli
təhsil quruluşu istiqamətində bugünkü uğurların
bünövrəsini qoymuşdur. Ötən əsrin 70-80-ci illərində
ümummilli liderin rəhbərliyi altında təhsil
müəssisələrinin şəbəkəsinin genişləndirilməsi və onların
zəngin maddi-texniki bazasının formalaşdırılması,
respublika hüdudlarından kənarda yüksək ixtisaslı
mütəxəssislərin, o cümlədən hərbi kadrların
yetişdirilməsi, Elmlər Akademiyasının elmi-tədqiqat
institutlarında fundamental elmin inkişafının təmin
olunması gələcəkdə milli müstəqillik üçün zəmin
yaratmışdır. Ulu öndər müstəqillik illərində də təhsilin
inkişafını diqqətdən kənarda qoymamışdır. Ümummilli
lider bu sahədə mövcud olan problemlərin aradan
qaldırılması və Azərbaycanda dünyanın inkişaf etmiş
ölkələrinin təcrübəsinə uyğun təhsil strategiyasının
həyata keçirilməsi üçün mühüm tarixi fərman və
sərəncamlar imzalamışdır. Dahi şəxsiyyətin rəhbərliyi
ilə təhsil sahəsində islahatlar uğurla həyata
keçirilmiş, yeni məktəblər tikilmiş, məktəblərin
maddi-texniki bazası möhkəmləndirilmiş, təhsilin məzmunu
yeniləşməyə başlamışdır.
Sevindirici haldır ki, bu gün Heydər Əliyev siyasəti
ölkəmizdə, eləcə də muxtar respublikamızda uğurla davam
etdirilir. Danılmaz həqiqətdir ki, cəmiyyətin bütün
sahələrindəki dirçəliş, intibah meyilləri sosial-mədəni
sferada da özünü qabarıq büruzə verir. Bütün bu
irəliləyiş, sürətli inkişaf isə Heydər Əliyev siyasi
kursuna sədaqətin bariz nümunəsidir.
Mətbuat xidməti |
