|
 Azərbaycanda
səfərdə olan Avropa Komissiyasının sədri Joze Manuel
Barrozu iyunun 14-də "ADA" Universitetində "Avropa
İttifaqı-Azərbaycan: Yeni imkanlar və çağırışlar"
mövzusunda mühazirə oxumuşdur.
AzərTAc xəbər verir ki, tədbirdə dövlət rəsmiləri, Milli
Məclisin deputatları, ali təhsil məktəblərinin
rektorları və diplomatlar iştirak etmişlər.
Görüşdə çıxış edən "ADA" Universitetinin rektoru Hafiz
Paşayev demişdir ki, Azərbaycan hazırda Avropa İttifaqı
ilə müxtəlif sahələrdə əməkdaşlıq edir. Rektor təhsil,
elm, ticarət və enerji sahələrində uğurlu layihələrin
olduğunu bildirmişdir. H.Paşayev demişdir ki, Azərbaycan
Avropa İttifaqı ilə münasibətlərini daim inkişaf
etdirmək və yeni layihələr həyata keçirməkdə maraqlıdır.
Avropa Komissiyasının sədri Joze Manuel Barrozu
bildirmişdir ki, Azərbaycanda böyük irəliləyişlər baş
verir. O qeyd etmişdir ki, səfəri çərçivəsində
Azərbaycan və Avropa İttifaqı arasında təhsil sahəsində
əməkdaşlığı daha da genişləndirməklə bağlı razılıq əldə
olunmuşdur. J.M.Barrozu qeyd etmişdir ki, "ADA"
Universiteti nümunəvi təhsil ocaqlarından biri kimi bu
istiqamətdə böyük rol oynaya bilər. O, Avropa
İttifaqının təhsil proqramları çərçivəsində "ADA"
Universiteti ilə əməkdaşlıqdan məmnun olduqlarını
bildirmişdir.
Azərbaycanın Şərq ilə Qərb arasında körpü olduğunu deyən
Avropa Komissiyasının sədri ölkəmizin regional və
beynəlxalq məsələlərin həllində mühüm rol oynadığını
qeyd etmişdir. Azərbaycanın həyata keçirdiyi mühüm
enerji layihələrinin əhəmiyyətindən danışan J.M.Barrozu
"Cənub" qaz dəhlizinin reallaşdırılmasının birgə
prioritetlərdən olduğunu bildirərək demişdir: "Bu
layihənin həyata keçirilməsi Avropa İttifaqının
Azərbaycanın enerji resurslarına çıxışını təmin
edəcəkdir. Eyni zamanda, bu layihə Aİ ilə Azərbaycan
arasında daha dərin iqtisadi əməkdaşlığa imkan verəcək,
30 min yeni iş yerinin açılmasına şərait yaradacaqdır".
J.M.Barrozu qeyd etmişdir ki, "Cənub" qaz dəhlizi həm
Azərbaycanın iqtisadi inkişafına, həm də Avropanın
enerji təhlükəsizliyinin təmininə töhfə olacaqdır.
Avropa Komissiyasının sədri bildirmişdir ki, Azərbaycan
ilə Aİ arasında viza rejiminin sadələşdirilməsi
istiqamətində işlər aparılmışdır. Bu sahədə
irəliləyişlərin olması ünsiyyəti və əlaqələri daha da
asanlaşdıracaqdır.
Joze Manuel Barrozu vurğulamışdır ki, Dağlıq Qarabağ
münaqişəsi Azərbaycan üçün ağrılı məsələdir. O demişdir:
"Atəşkəs rejiminin əldə olunmasından 20 il keçməsinə
baxmayaraq, hələ də sülh əldə edilməmişdir. Biz tərəflər
arasında sülhə nail olunmasını istəyirik və Minsk
qrupunun bu istiqamətdə fəaliyyətini dəstəkləyirik.
Biz əlimizdən gələni etməliyik ki, Dağlıq Qarabağ
münaqişəsinin beynəlxalq hüququn prinsipləri əsasında
həllinə nail olaq".
Avropa İttifaqının Azərbaycanın suveren hüquqlarına
hörmətlə yanaşdığını deyən J.M.Barrozu tərəfdaşlığın
sülh və rifaha əsaslandığını qeyd etmişdir. O
bildirmişdir ki, gələcək təhsil və elmlə bağlıdır. Biz
Azərbaycan ilə Avropa İttifaqı arasında əməkdaşlığı bu
istiqamətdə qurmağa çalışırıq.
Avropa Komissiyasının sədri bildirmişdir ki, ilk Avropa
Oyunlarının Bakıda keçirilməsi Azərbaycanı dünyaya daha
yaxından tanıtmağa imkan verəcəkdir. J.M.Barrozu
demişdir: "Azərbaycanın intellektual imkanları onun
təbii resurslarından qat-qat üstündür. Azərbaycanda
qədim tarix, zəngin mədəniyyət vardır". |
