|
"Gənc istedadlar" liseyində "Son zəng"
 Mayın
30-da Bakı Dövlət Universitetinin nəzdindəki "Gənc
istedadlar" liseyində "Son zəng" mərasimi keçirildi.
Tədbirdə BDU-nun rektoru, akademik Abel Məhərrəmov,
Təhsil Nazirliyinin nümayəndəsi Vəfa Yaqublu, liseyin
müəllim-şagird kollektivi, valideynlər və digər şəxslər
iştirak edirdilər.
Tədbiri giriş sözü ilə açan akademik Abel Məhərrəmov
məzunları təbrik edərək onlara gələcək həyatlarında
uğurlar arzuladı. Qeyd edildi ki, lisey artıq altıncı
ildir məzunlarını Azərbaycan cəmiyyətinə yola salır.
Liseyi bitirən məzunların qəbul imtahanlarında yüksək
nəticələr göstərdiyini qeyd edən A.Məhərrəmov həmin
göstəricinin bu il də təkrar olunacağına ümid
bəslədiyini bildirdi. Diqqətə çatdırıldı ki, Tələbə
Qəbulu üzrə Dövlət Komissiyasının statistik məlumatına
əsasən 2009, 2010, 2011, 2012 və 2013-cü illərdə liseyin
məzunları topladıqları orta bala və düzgün cavabların
faizinə görə respublikada ən yüksək nəticələr
göstərmişdir. 2013-cü ildə liseyin məzunları qəbul
imtahanlarında topladıqları orta bala (508,816) görə
Təhsil Nazirliyinin tabeliyində olan və özəl liseylər
arasında I yeri tutmuşdur. Həmin məzunlardan bir qismi
dünyanın nüfuzlu ali təhsil müəssisələrində təhsil alır.
Dövlət tərəfindən təhsilə göstərilən qayğıdan söz açan
rektor ölkə Prezidenti cənab İlham Əliyevin rəhbərliyi
altında bütün sahələrdə aparılan islahatları yüksək
qiymətləndirdi. Respublikamızın günü-gündən
çiçəkləndiyini bildirən A.Məhərrəmov məzunlara dövlət
quruculuğunda yaxından iştirak etməyi tövsiyə etdi.
Məzunların böyük tarixə malik olan BDU-nun adını və
şərəfini hər yerdə ləyaqətlə daşıyacaqlarına inam ifadə
olundu. Liseyin 2013-2014-cü tədris ili ərəfəsində bir
çox nailiyyətlər əldə etdiyi nəzərə çatdırıldı.
Bildirildi ki, liseyin şagirdləri respublika fənn
olimpiadalarında, "Sabahın alimləri" III Respublika
müsabiqəsində və digər yarışlarda ən yüksək nəticələr
göstəriblər.
Tədbirdə çıxış edən liseyin direktoru, professor Qasım
Hüseynov qonaqları salamlayaraq məzunlara qarşıdan gələn
imtahanlarda müvəffəqiyyətlər arzuladı. Q.Hüseynov lisey
haqqında məlumat verərək qeyd etdi ki, bu il təhsil
ocağını 37 şagird bitirir. Liseyin indiyə qədər 6
buraxılışı olub və məzunların hər biri ali təhsil
müəssisələrinə daxil olub. Liseyin builki məzunlarının
da yüksək nəticələr göstərərək nüfuzlu ali təhsil
müəssisələrinə daxil olacaqlarına ümidvar olduğunu qeyd
edən Q.Hüseynov məzunları və onların valideynlərini
əlamətdar gün münasibətilə təbrik etdi. Onlara ölkəmizə
layiqli vətəndaş və şəxsiyyət olmalarını, daim çalışmağı
tövsiyə etdi.
Tədbirə Dövlət himnimizin sədaları altında Dövlət
bayrağı və BDU-nun bayrağı gətirildi. Sonra sözləri şair
Oktay Zəngilanlıya, musiqisi Rəşid Şəfəqə məxsus olan
"Biz gənc istedadlarıq" adlı liseyin himni
səsləndirildi. Şagirdlərin hazırladıqları bədii hissədən
sonra rəmzi açar onunculara verildi, "son zəng"
səsləndirildi.
Niyazi RƏHİMOV,
"Azərbaycan müəllimi"
Gəncə Dövlət Universitetində məzun günü
 Mayın
30-da Gəncə Dövlət Universitetində təntənəli məzun günü
keçirildi. Tədbirin aparıcıları təbrik üçün sözü
universitetin rektoru, professor Yusif Yusibova
verdilər. Rektor məzunları professor-müəllim heyəti
adından təbrik edərək onlara gələcək həyat yollarında
uğurlar arzuladı. Ölkə Prezidenti İlham Əliyev
tərəfindən 2014-cü ilin "Sənaye ili" elan olunmasını
məzunların diqqətinə çatdıran rektor ölkəmizdə gənclər
üçün yeni perspektivlər açılacağını bildirdi.
Dörd ildir ki, təhsil aldığınız doğma universitetinizdən
ayrılırsınız, - deyən Y.Yusibov gənclərdən bəzilərinin
təhsilini magistraturada davam etdirəcəyini, yeni iş
yerlərinə gedəcəyini, hərbi xidmətə yollanacağını
söylədi: - Harada təhsilinizi davam etdirəcəyinizdən,
işləyəcəyinizdən asılı olmayaraq, əminəm ki, doğma
vətənimizə ləyaqətli vətəndaş olacaqsınız. Həyatın
enişli-yoxuşlu yollarında çətinliklərə sinə gərib
irəliləməyinizi, bütün sınaqlardan üzüağ çıxmağınızı,
Gəncə Dövlət Universitetinin adını şərəflə
doğrultmağınızı arzulayıram.
Sonra təbrik üçün söz universitetin tərbiyə işləri üzrə
prorektoru, dosent Asif Cavadova verildi. O, məzunları
təbrik edərək ulu öndər Heydər Əliyevin anadan olmasının
91-ci ildönümü münasibətilə respublika tələbələrinin
bədii yaradıcılıq festivalında universitetin bədii
yaradıcılıq kollektivlərinin yüksək nailiyyətlər əldə
etdiyini, 3 məzun tələbənin qalib olduğunu bildirdi.
Rektor, professor Yusif Yusibov bu nailiyyətlərin
qazanılmasında böyük əməyi olan musiqi fənləri
kafedrasının müdiri, professor Sevda Qurbanəliyevaya
rektorluğun Fəxri fərmanını, qalib tələbələrə isə Təhsil
Nazirliyinin və Ali Təhsil İşçiləri Həmkarlar İttifaqı
Komitəsinin diplom və sertifikatlarını təqdim etdi.
Tədbirin bədii hissəsində iqtisadiyyat və idarəetmə
fakültəsi tələbələrinin xorla ifa etdiyi "Tələbə"
mahnısı iştirakçılar tərəfindən alqışlarla qarşılandı.
Mətbuat xidməti
Onbirincilərin "Son zəng" həyəcanı
 "Son
zəng" günündə Bakıdakı 263 nömrəli tam orta məktəbin
həyətində bəlkə də indiyədək görünməmiş bir izdiham
vardı. Böyüklü-kiçikli hər kəsin - şagirdlərin,
müəllimlərin, valideynlərin çöhrəsindəki sevinc də bu
günün qeyri-adiliyindən xəbər verirdi. Boyunlarından
asdıqları ağ lentin üstündə "Məzun -2014" yazılan
məktəbli oğlan və qızlar - builki məzunlar "Koroğlu"
operasının uvertürasının sədaları altında mətin
addımlarla meydanda öz yerlərini tutdular.
Aparıcılar son dəfə şagird kimi məktəb həyətinə yığışan
onbirinciləri təbrik etmək üçün ən şirin, ən kövrək
sözlərdən çələng hördülər. Sonra məktəbin direktoru
Nəsimi Abbasova söz verildi. O, tədbir iştirakçılarına
doğma təhsil ocağının son illərdə qazandığı uğurları
xatırladaraq indiki məzunlardan daha böyük nəticələr
gözlədiyini dedi.
Onbirincilər ən kövrək anlarında, sevincli-kədərli
dəqiqələrində qayğılarını, düşüncələrini bölüşdükləri
sinif müəllimlərinin - Xatirə Mehdiyevanın, Arzu
Əliyevanın, Təranə Səmədovanın, Ənvər Mürşüdinin
adlarını iftixarla çəkdilər. Gözlərində-könüllərində
ucalıqdan heç vaxt enməyəcək ibtidai sinif müəllimləri -
Tahirə Hacıyeva, Ceyran Məmmədova, Nailə Həsənova, Adilə
Hüseynova, Nərgiz Məmmədova bir-bir söz alıb, ən şirin
diləklərini məzunlara yetirdilər.
Aparıcılar onbirincilərin ürək sözlərinə ayna tutdular.
Qloballaşan dünyadan baş çıxarmaq üçün onlara elmin
sirlərini öyrədən, yeni texnologiyalarla dostlaşdıran
fənn müəllimlərindən minnətdarlıq duyğusu ilə
danışdılar. Sonra müəllimlərdən Sona Hüseynova, Sərfinaz
Həsənova, Təranə Balayeva məzunlara Azərbaycanımıza
layiq vətəndaşlar kimi yetişmələrini, cəmiyyətimiz üçün
faydalı olmalarını arzuladılar. Fənn olimpiadalarında
doğma məktəbin şərəfini daim uca tutan, bilik
yarışlarında uğurları ilə bütün kollektivi sevindirən
Yusif Əliyev, Nigar Əmiraslanova kimi məzunların qarşıda
onları gözləyən sınaqdan da müvəffəqiyyətlə
çıxacaqlarına ümid etdiklərini söylədilər. Onbirincilər
isə arzularını musiqinin könülaçan dili ilə ifadə
etdilər.
Azərbaycan Respublikasının Prezidenti yanında Dövlət
Qulluğu Məsələləri üzrə Komissiyanın eksperti Əhməd
Abbasbəyli, Xətai Rayon Gənclər və İdman İdarəsinin
rəisi Əfqan Rzayev orta təhsili bitirmələri münasibəti
ilə məzunları təbrik etdilər, təhsildə fərqlənən
şagirdləri fəxri fərmanla mükafatlandırdılar.
Söz məktəb valideyn komitəsinin sədri, "Savalan"
qəzetinin baş redaktoru Eldar Əliyevə verildi. Eldar
müəllim ikiqat sevinc yaşadığını deməklə yanaşı, övladı
Yusifin də məzunlar arasında olmasından duyduğu həyəcanı
tədbir iştirakçıları ilə bölüşdü. Azərbaycan Uşaqlar
Birliyinin sədri Kəmalə Ağazadənin, "Savadlı Cəmiyyət"
Müasir Təhsilə Dəstək İctimai Birliyinin sədri Fuad
Dərgahlının imzaları ilə təhsildə və ictimai işlərdə
fərqlənən daha bir neçə şagirdə diplomlar, fəxri
fərmanlar verildi. Birincilərin təbriki isə tədbirə bir
başqa rəng qatdı. Şeirlər bir-birinə bənd oldu, nəğmə
nəğməyə qovuşdu...
Yusif ƏLİYEV,
"Azərbaycan müəllimi"
Tədris ocaqlarında "son zəng" mərasimi
Mayın 30-da Bakıdakı 239 nömrəli məktəbdə "Son
zəng" tədbiri keçirildi. Onbirincilərin məktəbin
həyətindəki meydançaya daxil olması ilə başlayan
tədbirdə müəllim-şagird kollektivi ilə yanaşı
valideynlər və qonaqlar da iştirak edirdilər. Aparıcılar
mərasim iştirakçılarını salamlayıb, onbirinciləri təbrik
etdilər. Şagirdlərin ifasında Dövlət himni
səsləndirildi. Üzeyir Hacıbəylinin "Koroğlu" operasının
uvertürasının sədaları altında əsgər paltarı geyinmiş
iki şagird Dövlət bayrağını meydançanın ortasına
gətirdi.
Tədbiri giriş sözü ilə açan məktəbin direktoru Sədaqət
Əzimova məzunları təbrik etdi, onlara gələcək
həyatlarında uğurlar arzuladı. Bildirildi ki, bu il
məktəb 81 məzunu Azərbaycan cəmiyyətinə yola salır. Ötən
il məzunların 70 %-i ali məktəbə qəbul olaraq tələbə
adını qazanıb. Onlardan Aygül Süleymanlı qəbul
imtahanlarında 695 bal toplayaraq "ADA" Universitetinə
daxil olub. Bundan başqa, şagirdlərin fənn
olimpiadalarında və müxtəlif müsabiqələrdəki
nailiyyətlərindən də söz açıldı.
Tədbirdə çıxış edən XI c sinfinin rəhbəri, məktəbin
Azərbaycan dili və ədəbiyyat müəllimi Zərqələm Orucova
onbirinciləri kövrək hisslərlə yola saldıqlarını
bildirdi. Onlara gələcək müstəqil həyatlarında uğurlar
arzuladı. Məzunlara harada olmalarına baxmayaraq
Azərbaycanın adını həmişə uca tutmağı tövsiyə etdi.
Sonra onbirincilər hazırladıqları maraqlı proqramı
təqdim etdilər. Birinci sinif şagirdləri onbirinciləri
şeirlər və mahnılarla təbrik etdilər.
Nəhayət, mərasimin ən kövrək və həyəcanlı anı gəlib
çatdı. "Son zəng" çalındı.
***
Mayın 30-da Bakı Humanitar Kollecində "Son zəng"
tədbiri keçirildi. Həmin gün kollecin pedaqoji və
mədəni-maarif və musiqi şöbəsinin tələbələri də digər
həmyaşıdları kimi sevincli, həm də həyəcanlı idilər.
"Son zəng"lə əlaqədar kollecin akt zalında mərasim
hazırlanmış, foyedə son kurs tələbələrinin əl
işlərindən ibarət sərgi nümayiş olunurdu. Mərasim
musiqi sədaları altında məzunların akt zalına daxil
olması ilə başlandı. Dövlət himni ifa olunduqdan sonra
tədbiri açan aparıcılar mərasim iştirakçılarını
salamladı, kolleci bitirən tələbələri məzun olmaları
münasibəti ilə təbrik etdilər.
Kollecin direktor müavini Hümbət Əhmədov, şöbə
müdirlərindən Talıb Zülfiyev, Rasim Mehdiyev,
müəllimlərdən Bahar Vəliyeva, Şölə Ağayeva, Lalə
Əliyeva məzunları təbrik edərək onlara xalqımıza,
dövlətimizə layiq vətənpərvər şəxsiyyətlər kimi
formalaşmağı arzuladılar.
Yumoristik danışıqları, məzəli əhvalatları ilə
məzunların sevincinə şərik olan respublikanın xalq
artisti, Bakı Humanitar Kollecinin məzunu Arif Quliyev
də məzunlara təbrikini çatdırdı, onlara gələcəkdə harada
işləmələrindən asılı olmayaraq təhsil aldıqları kolleci
və müəllimlərini heç zaman unutmamalarını tövsiyə etdi.
Məzunların hazırladıqları ədəbi-bədii kompozisiya
göstərildi. Onlar sülh göyərçinlərini göyə uçurmaqla
kolleclə və sevimli müəllimləri ilə vidalaşdılar.
***
Bakıdakı 267 nömrəli məktəb-liseydə
"Son zəng" tədbiri musiqi sədaları altında
onbirincilərin məktəbin bayramsayağı bəzədilmiş geniş
həyətindəki meydançaya daxil olması ilə başladı.
Aparıcılar mərasim iştirakçılarını salamlayıb
onbirinciləri məzun olmaları münasibəti ilə təbrik
etdilər. Şagirdlərin ifasında Dövlət himni
səsləndirildi. Aparıcılar ölkəmizdə son illər təhsilin
inkişafı yönündə görülən işlərdən, əldə olunan
uğurlardan, ümummilli liderimiz Heydər Əliyevin təhsilə,
gənclərə göstərdiyi diqqət və qayğısından danışdılar.
Bildirdilər ki, həmin siyasəti bu gün ölkə Prezidenti
cənab İlham Əliyev uğurla davam etdirir. Onun
məqsədyönlü, qətiyyətli siyasəti nəticəsində ölkəmiz
bütün sahələrdə olduğu kimi, təhsildə də dünyada
tanınır.
Onbirinciləri, birinciləri və onların valideynlərini
təbrik edən məktəb-liseyin direktoru Adilə Orucova
məzunlara ən xoş arzularını bildirdi. Qeyd edildi ki,
məktəbdə təhsil alan 1640 şagirddən 83-ü bu gün məzun
olur. Dərs ili boyu qazandığı uğurları və təlim-tərbiyə
sahəsində yüksək göstəriciləri ilə fərqlənmiş şagird və
müəllimlərə mükafat və diplomlar təqdim edildi.
Sonra onbirincilər hazırladıqları maraqlı proqramı
təqdim etdilər. Məzunlar onların formalaşmasında rolu
olan müəllimlərinə minnətdar olacaqlarını dedilər.
Birinci sinif şagirdləri onbirinciləri şeirlər və
mahnılarla təbrik etdilər.
Sonda "son zəng" çalındı.
"Azərbaycan müəllimi"
Ulu öndərin adını daşıyan liseydə sevinc dolu anlar
 Mayın
31-də Bakıdakı Heydər Əliyev adına liseydə "Son zəng"
mərasimi keçirildi. Tədbirdə liseyin müəllim-şagird
kollektivi ilə yanaşı Xətai Rayon İcra Hakimiyyətinin
nümayəndəsi Zaməddin Əkbərov, Azərbaycan Müəllimlər
İnstitutunun əməkdaşı Xuraman Nağıyeva, valideynlər və
digər qonaqlar iştirak edirdilər.
Tədbiri giriş sözü ilə açan liseyin direktoru, əməkdar
müəllim Fikrət Xəlilov məzunları təbrik edərək onlara
gələcək həyatlarında uğurlar arzuladı. Liseyin
uğurlarından söz açan direktor qeyd etdi ki, ötənilki
məzunların 109 nəfəri respublikamızın nüfuzlu ali təhsil
müəssisələrinə, 1 nəfəri isə xarici ölkədə yerləşən ali
məktəbə daxil olub. Onlardan 34 nəfərinin 500-dən yuxarı
bal topladığını nəzərə çatdıran F.Xəlilov yüksək
göstəricilərin bu il də təkrar olunacağına ümid
bəslədiyini vurğuladı. Bildirildi ki, 2013-cü ildə
TQDK-nın statistik məlumatına əsasən lisey Təhsil
Nazirliyinin tabeliyində olan və özəl liseylər arasında
10 ən yaxşı ümumtəhsil məktəbi arasındadır. Liseyin
məzunlarının ulu öndər Heydər Əliyevin adını daşıyan
təhsil ocağının şərəfini hər yerdə ləyaqətlə
daşıyacaqlarına inam ifadə olundu. Təhsil müəssisəsinin
uğurlarının ilbəil daha da artdığını diqqətə çatdıran
F.Xəlilov qeyd etdi ki, liseyin VIII sinif
şagirdlərindən Sücaət Hüseynova və Qənirə Şirinova
"Ətraf Mühitin Mühafizəsi" VIII Beynəlxalq Layihə
Olimpiadasında (İNEPO EUROASİA) bürünc medala layiq
görülüblər. Bundan başqa, liseyin VII sinif şagirdi
Ayxan Məcidli riyaziyyat fənnindən, VIII sinif şagirdi
Zülfüqar Həsənli isə informatika fənnindən beynəlxalq
olimpiadalara seçim turlarında yüksək nəticələr
göstərərək hazırda xüsusi olaraq həmin olimpiadalara
hazırlaşırlar. Şagirdlərdən Lalə Heydərovanın rəsmləri
"Qalereya 69" sərgi salonunda nümayiş etdirilmiş və
respublikamızın nüfuzlu rəssamları tərəfindən yüksək
qiymətləndirilmişdir. Liseyin idman sahəsindəki
uğurlarından da söz açan F.Xəlilov qeyd etdi ki, təhsil
ocağının futbol komandası ümummilli lider Heydər
Əliyevin anadan olmasının 91-ci ildönümünə həsr olunmuş
Xətai rayon məktəbləri arasında keçirilən yarışın qalibi
olub.
Dövlət tərəfindən təhsilə göstərilən qayğıdan danışan
direktor möhtərəm Prezidentimiz İlham Əliyevin
rəhbərliyi altında ölkədə aparılan islahatları yüksək
qiymətləndirərək məzunlara bu imkanlardan maksimum
dərəcədə faydalanmağı tövsiyə etdi.
Tədbirdə çıxış edənlər məzunlara enişli-yoxuşlu həyatda
daim məğrur olmağı, vətənə, millətə sədaqətlə xidmət
etməyi tövsiyə etdilər, onlara gələcək həyatlarında
uğurlar arzuladılar.
Sonra birincilər onbirinciləri şeir, mahnı və rəqslərlə
təbrik etdi. "Məktəb illəri" mahnısının sədaları ətrafa
yayıldı. Onbirincilər məktəbin rəmzi açarını onunculara
təqdim etdikdən sonra "son zəng" çalındı.
Niyazi RƏHİMOV,
"Azərbaycan müəllimi"
Unudulmaz gün
 Mayın
30-da Bakıdakı 83 nömrəli məktəb-liseydə "Son zəng"
tədbiri keçirildi. Dövlət himni ifa olundu. Hər bir
Vətən övladı üçün əziz olan üçrəngli Dövlət bayrağı
təntənəli şəkildə meydana gətirildi.
Tədbiri giriş sözü ilə açan direktor Yaqut Sadıqova
müəllimləri, şagirdləri, məzunları və onların
valideynlərini təbrik edərək müasir Azərbaycanın
gələcəyi üçün sağlam, vətənpərvər, yüksək təhsilli
gənclərin yetişdirilməsində valideynlərin rolundan,
məktəb-liseyin uğurlarından danışdı. Bildirdi ki,
hazırda bu təhsil ocağında 2000 şagird təhsil alır.
Onların təlim-tərbiyəsi ilə 152 müəllim məşğul olur.
Son illərdə məktəb-liseyin 4 nəfərinə "Əməkdar müəllim"
fəxri adı, digər 4 nəfər müəlliminə "Tərəqqi" medalı
verilib. Bundan başqa, 4 nəfər müəllim "Ən yaxşı
müəllim" müsabiqəsinin, məktəb-lisey "Ən yaxşı
ümumtəhsil məktəbi" müsabiqəsinin qalibi olub. 2 nəfər
müəllim isə "Azərbaycan Respublikası qabaqcıl təhsil
işçisi" döş nişanı ilə təltif olunub. 6 nəfər məzuna
Azərbaycan Respublikası Prezidentinin sərəncamı ilə
Prezident təqaüdü verilib. "Təhsil millətin gələcəyidir"
deyən ulu öndərimiz Heydər Əliyevin layiqli davamçısı,
möhtərəm Prezidentimiz İlham Əliyev cənablarının,
təhsilimizin inkişafında misilsiz xidmət göstərən Heydər
Əliyev Fondunun prezidenti, Milli Məclisin deputatı
Mehriban xanım Əliyevanın təhsilə olan sonsuz diqqət və
qayğısından söz açıldı.
Binəqədi Rayon İcra Hakimiyyəti başçısının müavini
Vüsal İsmayılov məktəbi bitirən məzunları rayon icra
hakimiyyəti başçısı adından təbrik etdi və onlara
qarşıdan gələn imtahanlarda müvəffəqiyyətlər, uğurlar
arzuladı. Dövlət tərəfindən təhsilə göstərilən qayğıdan
söz açan V.İsmayılov ölkə Prezidenti cənab İlham
Əliyevin rəhbərliyi altında bütün sahələrdə olduğu kimi,
təhsildə də aparılan islahatları yüksək qiymətləndirərək
məzunlara bu imkanlardan maksimum dərəcədə faydalanmağı
tövsiyə etdi.
Çıxış edən məzunlar bildirdilər ki, respublikamızda və
ya xaricdə öz təhsillərini davam etdirsələr belə,
sevimli müəllimlərini və təhsil aldıqları doğma
məktəblərini heç vaxt unutmayacaqlar.
Şagirdlərin hazırladıqları bədii hissədən sonra rəmzi
açar onunculara verildi, "son zəng" çalındı və həmin gün
məzunların həyatında unudulmaz xatirəyə çevrildi.
Rəşad RAMAZANOĞLU,
"Azərbaycan müəllimi" |
