Mayın 1-də Bakıdakı 229 nömrəli tam orta məktəbdə ümummilli lider Heydər Əliyevin anadan olmasının 89-cu ildönümünə həsr olunmuş "bilik yarışı" keçirildi.  

Əvvəlcə tədbir iştirakçıları məktəbin foyesində ulu öndərin həyat və fəaliyyətinin bəzi məqamlarını əks etdirən fotolardan ibarət sərgi ilə tanış oldular. Təhsil ocağının direktoru Fəridə Bağırova  iştirakçıları müstəqil Azərbaycanın qurucusu ulu öndər Heydər Əliyevin anadan olmasının 89-cu ildönümü münasibəti ilə məktəbdə görülən işlərlə tanış etdi.  "Bilik yarışı"nda əvvəlcə şagirdlərin ifasında Dövlət himni səsləndi və ümummilli lider Heydər Əliyevin əziz  xatirəsi bir dəqiqəlik sükutla yad edildi. Ulu öndərə həsr olunmuş  film nümayiş etdirildi.

Məktəbin tarix müəllimi Nərgiz Haqverdiyeva  tarixi mənbələrə əsaslanaraq Heydər Əliyevin Azərbaycan xalqı qarşısındakı misilsiz xidmətlərindən danışdı. Sonra  bilik yarışması başladı.  Dörd turdan ibarət yarışma üçün seçilmiş suallar ulu öndərin həyatı, fəaliyyəti,  Azərbaycan və dünya tarixi haqqında idi.  Şagirdlərin yarışmada fəallığı və maraqlı fikirlər söyləməsi onların ulu öndərə və tariximizə olan sevgisindən irəli gəlirdi. Hər qrupun cavabı  münsiflər heyəti tərəfindən yazı lövhəsində qeyd olunurdu.  Axırıncı mərhələdən sonra cavabların hesablanması başladı. Nəticəyə görə, VI "b" I yer, VI "a" II yer, VI "c" isə III yeri tutdu. Qalib komandalar   Azərbaycan  xəritəsini əks etdirən qartal suveniri ilə mükafatlandırıldı.  

R.RAMAZANOĞLU