Bu günlərdə Azərbaycan Bəstəkarlar İttifaqında təntənəli tədbir keçirilirdi. Ü.Hacıbəyli adına Bakı Musiqi Akademiyasının professorları, tələbələri, Azərbaycanın tanınmış bəstəkarları, digər ziyalılar - hamının üzündə fərəh, sevinc hissi sezilirdi. Onlar sevimli müəllimləri, istedadlı alim Nailə Mehdiyevanın 80 illik yubileyini təbrik etməyə gəlmişdilər. Bəstəkarlar İttifaqının sədri, professor Firəngiz Əlizadə, professor Cəmilə Həsənova, Aygün Səmədzadə və başqaları çıxış edərək Nailə xanımın keçdiyi şərəfli ömür yolu və yaradıcılığı haqqında söz açdılar.

Bildirildi ki, o, konservatoriyadakı təhsilini uğurla başa vurduqdan sonra musiqi tarixi kafedrasında işləməyə başlayır. Sonralar burada dosent, professor vəzifələrinə kimi yüksəlir, kafedra müdiri, tarix-nəzəriyyə fakültəsinin dekanı olur. İşinin çoxluğuna baxmayaraq, dissertasiya müdafiə edərək sənətşünaslıq namizədi elmi dərəcəsini də alır.

N.Mehdiyeva müntəzəm olaraq bir sıra tədqiqat işlərilə də mətbuatda çıxış edib elmi maraq dairəsinin geniş olduğunu göstərir. Onun ən böyük uğuru isə pedaqoji sahə ilə bağlıdır. Bildiklərini tələbələrinə dərindən aşılamaq üçün  əlindən gələni əsirgəmir, şərhlər verməkdən yorulmurdu. Təki sabahın musiqiçiləri dərin biliyə yiyələnsinlər. Gəncləri tələbəlik illərindən zəhmətə alışdırmaq üçün çoxlu elmi ədəbiyyat tövsiyə edirdi. Onun zəngin təcrübəsindən, biliyindən Qazaxıstan Konservatoriyası da bəhrələnirdi. Belə ki, həmyerlimiz dəfələrlə oranın müəllimləri üçün "açıq dərs"lər verməyə  dəvət olunmuş, 8 il buraxılış imtahanları zamanı dövlət komissiyasına sədrlik etmişdir.

Qeyd edildi ki, 1993-cü ildən Nailə Mehdiyeva öz fəaliyyətini Ankaranın məşhur Bilkənd Universitetində davam etdirib. Burada Avropa musiqi tarixi, dünya opera incəsənəti tarixi, iyirminci yüzilliyin çağdaş musiqi tarixindən mühazirələr oxuyan azərbaycanlı xanım eyni zamanda həmin universitetin musiqi və səhnə sənətləri fakültəsində musiqi tarixi kafedrasına rəhbərlik edib.

Nailə xanımın vətəndən kənarda da elmi yaradıcılığı məhsuldar olub. O, Bilkənd simfonik orkestrinin ifa etdiyi əsərlər haqda məlumatlar yazıb ərsəyə gətirmişdir. Sonradan bunlar ingilis, fransız, alman dillərinə tərcümə olunaraq disklərə köçürülmüşdür. Nailə xanım Türkiyədə də maarifçilik işinə öz töhfələrini vermişdir. Belə ki, onun bəstəkarların həyat və yaradıcılığı, simfonik opera əsərlərinin təhlili əsasında yazdığı proqramlardan təkcə Bilkənd Universitetinin tələbələri bəhrələnmirdilər. Onlardan Türkiyənin başqa ali məktəblərində də geniş istifadə edilirdi.

Azərbaycan musiqi mədəniyyəti, bəstəkarlarımızın yaradıcılığı haqqında geniş məlumatların Türkiyə ictimaiyyətinə çatdırılmasında Nailə xanımın əvəzsiz xidməti var.

Çıxış edənlər yubilyarı təbrik edərək ona uzun ömür, cansağlığı, pedaqoji işlərində daha böyük uğurlar arzuladılar. 

İradə ƏSƏDOVA