Mayın 11-də Azərbaycan Dövlət  Pedaqoji Universitetində Təhsil Nazirliyi və Azərbaycan Təhsil İşçiləri Azad Həmkarlar İttifaqı Respublika Komitəsinin birgə təşkilatçılığı ilə keçirilən  tələbələrin XVII Respublika fənn olimpiadasının açılış mərasimi oldu.

Tədbiri təhsil naziri Misir Mərdanov açaraq may ayının əlamətdar hadisələrlə və bayramlarla zəngin olduğunu qeyd etdi. Mayın 10-da ümummilli lider Heydər Əliyevin anadan olmasının 89-cu ildönümünün xalqımız tərəfindən təntənəli şəkildə qeyd edildiyini söyləyən nazir müstəqil Azərbaycan dövlətinin banisi və qurucusu olan dahi şəxsiyyətin ölkə təhsilinin inkişafındakı əvəzsiz xidmətlərindən danışdı. Qeyd olundu ki, ulu öndərin siyasi kursunun layiqli davamçısı  ölkə başçısı cənab İlham Əliyev tərəfindən Azərbaycan təhsilinin inkişafına, gənclərə diqqət və qayğı göstərilir. Son illər ölkəmizdə gənclərin yüksək səviyyədə bilik və təhsil almaları üçün  hər cür şərait yaradıldığını deyən nazir dövlətimizin başçısının rəhbərliyi altında xüsusi istedada malik uşaq və gənclərin yaradıcılıq potensialının inkişafı istiqamətində görülən işləri tədbir iştirakçılarının diqqətinə çatdırdı.

Keçirilən fənn olimpiadasının əhəmiyyətinə toxunan təhsil naziri bilik yarışının ölkəmizin ali məktəblərində təhsil alan tələbələrin müxtəlif fənlərə marağının artırılmasına, həmçinin həmin fənlər üzrə onların hazırlıq səviyyəsinin nümayiş etdirilməsinə şərait yaratdığını, istedadlı gənclərin aşkara çıxarılmasına xidmət etdiyini bildirdi.

Nazir Misir Mərdanov ildən-ilə tələbələrin fənn olimpiadasına marağının artdığını deyərək bununla bağlı statistik rəqəmləri iştirakçıların nəzərinə çatdırdı. Məlumat üçün bildirdi ki, olimpiada iştirakçıları 12 fənn üzrə (riyaziyyat, fizika, kimya, biologiya, informatika, Azərbaycan dili, Azərbaycan tarixi, Azərbaycan coğrafiyası, ingilis dili, fransız dili, alman dili və rus dili) öz biliklərini nümayiş etdirəcəklər. Olimpiada ənənəvi olaraq II turda təşkil olunub. I tur cari ilin mart ayında ali təhsil müəssisələrində keçirilib və burada 2000-ə yaxın tələbə iştirak edib. Olimpiadanın yekun turunda 31 dövlət və 8 qeyri-dövlət ali təhsil müəssisəsindən 750 tələbə iştirak etmək hüququ qazanıb. Bilik yarışına Bakı şəhərində yerləşən ali təhsil müəssisələri ilə yanaşı, Naxçıvan, Gəncə, Lənkəran, Sumqayıt, Mingəçevir və respublikamızın digər şəhərlərində fəaliyyət göstərən ali təhsil ocaqları da qatılıb. Olimpiadanın yekun turuna vəsiqə qazanmış tələbələrin fənlər üzrə bölgüsü göstərir ki, gənclər tərəfindən ən böyük maraq  Azərbaycan dili və ingilis dili fənlərinədir. Belə ki, II turun iştirakçılarından 115 nəfəri (15,3%) ingilis dili, 103-ü (13,7%) Azərbaycan dili fənlərini seçib. 

Nazir tələbələrin olimpiadaya maraqlarının artmasını müsbət qiymətləndirərək 2007-ci ildən etibarən ali məktəb tələbələrinin fənn olimpiadasının Azərbaycan Təhsil İşçiləri Azad Həmkarlar İttifaqı Respublika Komitəsi ilə birgə keçirildiyini söylədi. Tələbələrin fənn olimpiadasının münsiflər heyətində respublikamızın tanınmış alim və pedaqoqlarının təmsil olunduqlarını deyən təhsil naziri bütövlükdə bilik yarışının keçirilməsində əməyi olanlara minnətdarlığını bildirdi.Çıxışının sonunda nazir Misir Mərdanov olimpiada iştirakçısı olan tələbələrə bir sıra dəyərli tövsiyələr verərək onlara nailiyyətlər arzuladı.

Tədbir iştirakçıları tərəfindən Azərbaycan Respublikasının Dövlət himni oxunduqdan sonra çıxış üçün söz alan Bakı Dövlət Universitetinin rektoru, Milli Məclisin deputatı Abel Məhərrəmov, Azərbaycan Təhsil İşçiləri Azad Həmkarlar İttifaqı Respublika Komitəsi sədrinin müavini Şaiq Əsgərov, Lənkəran Dövlət Universitetinin rektoru Asəf İsgəndərov, Azərbaycan Dövlət Pedaqoji Universitetinin rektoru, AMEA-nın müxbir üzvü, professor Yusif Məmmədov respublikamızın ali məktəblərində təhsil alan gənclərin elmi tədqiqat işinə cəlb olunması, onlarda elmə həvəs oyadılması, biliklərinin artırılması istiqamətində həyata keçirilən olimpiadaların, elmi konfransların, müsabiqələrin əhəmiyyətindən danışdılar. Çıxış edənlər olimpiada iştirakçılarına müvəffəqiyyətlər dilədilər.

Elə həmin gün respublikanın 39 ali məktəbindən 750 tələbə 12 fəndən öz bilik və bacarığını nümayiş etdirdi.

Qeyd edək ki, olimpiadanın qaliblərinə Azərbaycan Respublikası Təhsil Nazirliyi və Azərbaycan Təhsil İşçiləri Azad Həmkarlar İttifaqı Respublika Komitəsi tərəfindən diplomlar, hədiyyələr və pul mükafatları təqdim ediləcəkdir. 

Samirə KƏRİMOVA