Bolqarıstan Respublikası Xalq Məclisinin sədri xanım Tsetska Tsaçevanın başçılıq etdiyi nümayəndə heyəti Azərbaycana səfəri çərçivəsində mayın 14-də Bakı Slavyan Universitetində (BSU) olmuşdur.

AzərTAc xəbər verir ki, qonaqlar BSU-nun Bolqar Dili və Mədəniyyəti Mərkəzi ilə tanış olmuş, ali məktəbin rektoru, AMEA-nın müxbir üzvü, professor Kamal Abdullayev ilə görüşmüş və səmimi qəbula görə dərin minnətdarlıqlarını bildirmişlər. Professor K.Abdullayev qonaqları səmimi salamlayaraq onlara BSU-nun strukturundan, zəngin elmi və tələbəlik həyatından, hərtərəfli fəaliyyətindən söz açmışdır.

T.Tsaçeva vurğulamışdır ki, iki ölkə arasında münasibətləri inkişaf etdirmək üçün Azərbaycan və Bolqarıstanın ali məktəbləri arasında əlaqələri inkişaf etdirmək lazımdır. O, bolqarşünas tələbələrin təhsillərini Bolqarıstan universitetlərində davam etdirmələri imkanlarını vurğulamışdır.

BSU-nun professor-müəllim heyəti və tələbələri ilə görüşdə K.Abdullayev bildirmişdir ki, başçılıq etdiyi ali təhsil ocağında hazırda bolqarşünaslıq ixtisası üzrə 35 tələbə təhsil alır.

T.Tsaçeva vurğulamışdır ki, vətəndən minlərlə kilometr uzaqda milli bolqar kostyumları geyinmiş, onun ana dilində danışan gəncləri görmək olduqca xoşdur. Sədr qeyd etmişdir ki, bu gün başçılıq etdiyi nümayəndə heyəti çox məzmunlu görüşlər keçirmişdir. Bu görüşlərin ən başlıcası Azərbaycan Respublikasının Prezidenti ilə keçirilən görüş olmuşdur.

 T.Tsaçeva bildirmişdir ki, BSU-nun bir qrup tələbəsi üçün tezliklə Bolqarıstan parlamentində stajkeçmə təşkil ediləcəkdir. O, görüş iştirakçılarının çoxsaylı suallarına cavab vermiş, "Xatirə kitabı"nda ürək sözlərini yazmışdır.

 Sonra bolqar kostyumları geyinmiş tələbələr bolqar dilində şeir oxumuş, mahnı ifa etmişlər.