Mayın 15-də "Elektron təhsil" Respublika müsabiqəsinin I mərhələsi başa çatıb. "Müasir məktəbdə elektron tədris resursları" və "Təhsildə İnternet texnologiyaları" istiqamətləri üzrə təşkil olunan müsabiqəyə ümumilikdə 1092 layihə təqdim olunub.

Təhsil Nazirliyi Təhsil Sisteminin İnformasiyalaşdırılması İdarəsindən verilən məlumata əsasən, "Elektron təhsil" Respublika müsabiqəsinin II mərhələsinə keçən nominantlar 30 may tarixində elan olunacaqdır. I mərhələnin sona çatmasına baxmayaraq, layihələr üzrə şərhlərin verilməsi, layihələrin ictimai müzakirəsi müsabiqənin finalına kimi mümkün olacaqdır.  Müzakirələrdə iştirak etmək və ya şərh yazmaq istəyənlərin  sayı 7 min nəfər təşkil edir. Qeyd edək ki, müsabiqənin saytında qeydiyyatdan keçənlər əsasən müəllimlər, şagirdlər, valideynlər, tələbələr və təhsil üzrə mütəxəssislərdir.

Müsabiqədə 5 nominasiyanın hər biri üzrə qalib gələnlərə noutbuklar, netbuklar və digər xüsusi mükafatlar təqdim olunacaq.

"2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" çərçivəsində həyata keçirilən "Elektron təhsil" müsabiqəsi "Microsoft-Azərbaycan", Intel korporasiyasının "Gələcək üçün təhsil" proqramı, AZEDUNET, Ultra, Nar Mobile, HP və MƏDƏD təşkilatları tərəfindən dəstəklənir.  

"Elektron təhsil" Respublika müsabiqəsinin Təşkilat Komitəsi