|
Astara Pedaqoji Kollecində əhalini, xüsusən
gəncləri məlumatlandırmaq və maarifləndirmək
məqsədi ilə 1 nömrəli Ərazi üzrə Ekologiya və
Təbii Sərvətlər Şöbəsi ilə birlikdə tədbir
keçirilmişdir.
Tələbə və müəllimlərin iştirakı ilə keçirilən
tədbiri kollecin direktoru Əlihəsən Həmzəyev
açaraq qeyd etdi ki, gənclər arasında ekoloji
sahədə maarifləndirmə işlərinin aparılması
istiqamətində əməli fəaliyyət göstərmək
lazımdır. Pedaqoji Kollecin kollektivi hər il
ağacəkmə kampaniyasında fəal iştirak edir.
Sonra söz 1 nömrəli Ərazi üzrə Ekologiya və
Təbii Sərvətlər Şöbəsinin sektor müdiri Bəxtiyar
Hüseynova verildi. O, öz çıxışında "Turizm və
ətraf mühitin mühafizəsi", "Azərbaycanın nadir
təbiət inciləri haqqında", "22 Aprel -
Beynəlxalq Yer günüdür!", "Yeni yaşıllıqların
salınmasında gənc nəslin rolu" mövzularında
geniş məlumat verdi.
2010-ci il - "Ekologiya ili" çərçivəsində
ekoloji biliklərin təbliğində, ərazidə keçirilən
ekoloji tədbirlərdə, tələbələrin ekoloji
tərbiyəsində və onlarda təbiətə, ətraf mühitin
mühafizəsinə məhəbbət hisslərinin
formalaşmasında fəal iştirakına görə kollecin
direktoru Ə.Həmzəyevə Respublika ETSN-nin Fəxri
fərmanı təqdim edildi. H.Bağırov və Ə.Kərimovun
"Afrikanın geologiyası", B.Hüseynovun "Ekoloji
təbliğat və maarifləndirmə" kitabları kollecin
kitabxanasına hədiyyə edildi.
Bu tədbir kollecdə təhsil alan respublikanın
40-a yaxın şəhər və rayonundan gəlmiş tələbələr
tərəfindən böyük maraqla qarşılandı.
Azad ABDULLAYEV |
