|
 Minirə
Nəcəfzadə Azərbaycan Milli Konservatoriyasının
tərkibində Respublika İncəsənət Gimnaziyasının
VIII sinif şagirdidir. Yaşıdlarından qeyri-adi
istedadı ilə fərqlənən Minirə fortepiano
ifaçılığının sirlərini uşaq yaşlarından
öyrənməyə başlayıb. Dərslərini "əla" oxumaqla
bərabər, Azərbaycan və xarici ölkə
bəstəkarlarının əsərlərini məharətlə ifa edən
M.Nəcəfzadə dəfələrlə fəxri fərman və
diplomlarla təltif olunub.
O, özünü ilk dəfə birinci sinfi bitirərkən
2003-2004-cü tədris ili üzrə məktəbin
Azərbaycan Dövlət Filarmoniyasının Kamera və
Orqan Musiqi alətləri zalında keçirilən yekun
hesabat konsertində Ü.Hacıbəyli adına
Azərbaycan Dövlət Simfonik Orkestrinin
müşayiəti və respublikanın əməkdar incəsənət
xadimi, maestro Azad Əliyevin dirijorluğu ilə
ifa olunan İ.Berkoviçin "Fortepiano ilə simfonik
orkestr üçün konsert" də sınayıb. Minirə II
sinifdə oxuyarkən "Fortepiano və orkestr üçün
konsertlərin ən yaxşı ifası" müsabiqəsinin ən
gənc ifaçısı adına, "Pyeslərin ən yaxşı ifası"
müsabiqəsində isə II dərəcəli diploma layiq
görülüb. Dünya şöhrətli violençel ifaçısı Yo-Yo
Ma 2006-cı ilin mayında Milli
Konservatoriyanın müəllim və tələbələri ilə
keçirilən ustad dərsində III sinif şagirdi
M.Nəcəfzadənin fortepianoda ifa etdiyi Niyazinin
"Xoreoqrafik vals" əsərini dinləyərək onun
ifasını çox yüksək qiymətləndirib.
13 yaşlı Minirənin ifası artıq xarici ölkələrin
musiqi ictimaiyyəti tərəfindən də bəyənilir.
O, 2008-ci ilin aprelində Parisdə keçirilən
Nikolay Rubinşteyn adına IX, 2009-cu ilin
mayında İtaliyanın Bari şəhəri yaxınlığında
keçirilən Pietro Argento adına XII beynəlxalq
musiqi müsabiqələrinin laureatı kimi II yeri
tutaraq müvafiq diplomlara və "Pietro
Argento" medalına layiq görülüb. 2010-cu ildə
isə İspaniyanın Palma de Mallorca şəhərində
keçirilən fortepiano ifaçılarının XVIII
beynəlxalq musiqi müsabiqəsinin "Laureat-I Yer"
zirvə mükafatını qazanıb. Həmin il İngiltərənin
Nyukasl şəhərində keçirilən gənc fortepiano
ifaçılarının beynəlxalq musiqi müsabiqəsində də
I dərəcəli diploma sahib olub.
Azərbaycan Respublikasının Prezidenti İlham
Əliyevin 17 sentyabr 2010-cu il tarixdə
imzaladığı "Gənc istedadların xüsusi təqaüdə
layiq görülməsi haqqında" Sərəncamı ilə
Nəcəfzadə Minirə İlham qızının adı Azərbaycanın
gənc istedadlarının "Qızıl kitabı"na yazılmaqla
o, xüsusi aylıq təqaüdə layiq görülüb.
Sifai SƏFƏROVA |
