|
Ümumdünya Mədəniyyətlərarası Dialoq Forumunun
bir qrup iştirakçısı Astara rayonunda olub.
 Fəlsəfə
elmləri doktoru, professor, Rusiya Təbiyyat
Elmləri Akademiyasının akademiki, Rusiya Elmlər
Akademiyasının Fəlsəfə İnstitutunun
sosial-fəlsəfə bölməsinin müdiri Valentina
Fedotova, fəlsəfə elmləri doktoru, professor,
Rusiya Federasiyası hökumətinin nəzdində Maliyyə
Akademiyasının fəlsəfə kafedrasının müdiri,
Rusiya Fəlsəfə Cəmiyyətinin birinci
vitse-prezidenti Aleksandr Çumakov, sosioloji
elmlər doktoru, Moskva Beynəlxalq Münasibətlər
İnstitutunun sosiologiya kafedrasının müdiri
Nadejda Fedotova, fəlsəfə elmləri namizədi,
Rusiya Elmlər Akademiyasının Fəlsəfə
İnstitutunun dokrorantı, Rusiya Fəlsəfə
Cəmiyyətinin beynəlxalq məsələlər üzrə
vitse-prezidenti, M.V.Lomonosov adına Moskva
Dövlət Universitetinin "Qlobalistikada kim
kimdir və nə nədir" elmi-təhsil layihəsinin
ekspert şurasının üzvü Ariz Gözəlov,
sənətşünaslıq üzrə fəlsəfə doktoru, Musiqi
Akademiyasının dosenti Minaxanım Hacıyevanın
Astarada olduqları günlərdə rayonumuzun, eləcə
də Cənub zonasının tarixi, mədəniyyət
abidələrinə baş çəkməsi, görməli və təbii
mənzərəli yerlərini gəzməsi, füsunkar
təbiətimizin canlı nümunələri və xalqımızın
adət-ənənələri, hədsiz qonaqpərvərliyi və
istiqanlılığı ilə yaxından tanış olmaları
onlarda, bütövlükdə Azərbaycan haqqında olan
fikirlərin yeniləşməsinə gətirib çıxaracaqdır.
Qədim Azərbaycan torpağı olan Astara rayonunun
Miki kəndində uzun əsrlərin sınağından keçib bu
günə qədər gəlib çıxan maddi-mənəvi abidələrlə
tanışlıq onlarda daha böyük təəssürat oyatdı.
Qonaqlar ulu öndər Heydər Əliyevin abidəsini
ziyarət edərək xatirəsini böyük ehtiramla yad
ediblər. Heydər Əliyev Mərkəzində şəkil, stend
və eksponatlara baxan qonaqlar Mərkəzə xeyli
sayda kitab hədiyyə etmişlər. Astara Rayon İcra
Hakimiyyətinin başçısı M.Quliyev qonaqları qəbul
etmiş və rayona gəldiklərinə görə onlara öz
minnətdarlığını bildirmişdir.
Aprelin 11-də Astara Pedaqoji Kollecində
hörmətli qonaqlarla tələbə və müəllim
kollektivinin görüşü keçirilmişdir. Çıxış edən
qonaqlar kollecin direktoru, fəlsəfə doktoru,
respublikanın əməkdar müəllimi, dosent, Rusiya
Fəlsəfə Cəmiyyətinin üzvü Əlihəsən Həmzəyevə öz
minnətdarlıqlarını bildirmişlər. Azərbaycan
xalqına, Azərbaycan dövlətinə öz isti
münasibətlərini bildirən rusiyalı alimlər
forumla bağlı fikirlərini çatdırıblar. Onlar
birmənalı şəkildə bildirmişlər ki,
mədəniyyətlərarası dialoq bəşəriyyəti onu
gözləyən məhvdən və xaosdan xilas edəcək və bu
beynəlxalq forumun Azərbaycanda keçirilməsi
təsadüfi deyil. Kollecin müəllimlərindən şöbə
müdirləri Nəsir Süleymanov, Əliheydər Həmzəyev
və musiqi müəllimi Aybəniz Dadaşova qonaqları
hərarətlə salamlamış, onlara kollecə
gəldiklərinə görə minnətdarlıq etmişlər.
Azad ABDULLAYEV |
|
