|
Müstəqillik yolları ilə mətin addımlarla
irəliləyən Azərbaycan Respublikasında Təhsil
İslahatı Proqramının əsas konseptual ideyası və
təməl prinsiplərinin başlıca mahiyyəti
xalqımızın unudulmaz milli lideri Heydər
Əliyevin "Təhsil millətin gələcəyidir" müdrik
ifadəsində layiqincə dəyərləndirilmişdir.
Bu gün isə bu strateji təhsil siyasəti ulu
öndərin davamçısı, ölkə Prezidenti cənab İlham
Əliyev tərəfindən uğurla davam etdirilir. "XXI
əsr intellekt əsridir" deyən dövlət başçısı qeyd
edir ki, "dünyada gedən tərəqqinin əsas əlaməti
və səbəbi bilikdir, bacarıqdır, savaddır. Ona
görə Azərbaycanda yeni gənc nəslin
yetişdirilməsi və tərbiyə olunmasında təhsilin,
məktəbin çox böyük əhəmiyyəti var".
Təhsilimiz bu gün sürətlə inkişaf edir,
təkmilləşir, yeni forma və məzmunla zənginləşir.
Artıq inkişaf dinamikası elə bir vüsət almışdır
ki, uzun illər alışdığımız, nəticələrini müsbət
və proqressiv zənn etdiyimiz ensiklopedik bilik
sistemindən ibarət olan hafizə məktəbinin,
qaçılmaz reallığımız olan bazar iqtisadiyyatı və
mövcud ictimai-siyasi mühitin tələbləri ilə
uyğunlaşaraq idrak və təfəkkür məktəbinə
çevrilməsi prosesinin dönməzliyini təmin
etmişdir. Biz müəllimlər, bu prosesin fəal
iştirakçıları olmalıyıq. Qarşımızda duran ən
başlıca məqsəd ondan ibarət olmalıdır ki,
təhsilini başa çatdıran hər bir gənc potensial
imkanlarından tam istifadə etsin, həyatın bütün
tələblərinə uyğun dünyəvi bilik, bacarıq və
vərdişlərə yiyələnsin, ümumi təhsil məktəb
məzunu üçün müəyyən edilən ən vacib
kompetensiyalara yiyələnsin.
Sözsüz ki, bütün bunlara nail olmaq üçün, ilk
növbədə, məktəbin idarə edilməsi yeni forma və
məzmunla zənginləşdirilməli, fəaliyyət
strukturunun demokratik prinsiplər əsasında
qurulması təmin edilməlidir. Bununla yanaşı,
təhsilimizdə baş verən böyük dəyişikliklərin,
yenilik və islahatların, yeni təlim
texnologiyalarının nəbzini gecikmədən tutmağı
bacarmalıyıq, daim öz üzərimizdə çalışmalı,
təkmilləşməliyik, əlavə təhsil almalıyıq.
Bu baxımdan 2000-ci ildə ümummilli liderimiz
Heydər Əliyevin fərmanı ilə fəaliyyətə başlamış
Azərbaycan Müəllimlər İnstitutu hər bir təhsil
müəssisəsinin pedaqoji kadrlarının
ixtisasartırma, yenidənhazırlanma və əlavə
təhsil almaq ehtiyaclarını ödəyən əvəzolunmaz
tədris ocağıdır desəm, yəqin ki, səhv etmərəm.
Uzaqdan öz səliqə-sahmanı ilə hər kəsi cəlb edən
institutun gül-çiçəkli həyətinə daxil olduqda,
ilk növbədə, heyrətlə baxdığım "Heydər Əliyev
Mərkəzi" oldu. Öyrəndim ki, onun yaradıcısı
institutun rektoru, professor Aqiyə
Naxçıvanlıdır. O, ümummilli lider haqqında
zəngin material toplamış, dahi rəhbərimizin
bütün həyat və fəaliyyətini eksponatlarda əks
etdirmişdir. Ümumiyyətlə, A.Naxçıvanlının rektor
kimi fəaliyyət dövrünü institutun tarixində,
sözün əsl mənasında, intibah dövrü adlandırsaq,
səhv etmərik.
İnstitutda hökm sürən ciddi nizam-intizam,
professor-müəllim heyətinin yüksək davranış
mədəniyyəti, bu tədris müəssisəsində çalışmaqdan
duyduqları fərəh hissi müəllim peşəsinin nə
qədər müqəddəs olduğunu təsdiq edir. Elə hiss
etdim ki, burada fəaliyyət göstərən hər bir
müəllim özü də şagirddir və təlim-tərbiyə
prosesinin fəal iştirakçısıdır.
Təhsil müəssisəsinin idarə olunması aspektləri
ətrafında dinlədiyim müzakirə və dialoq
mahiyyətli mühazirələrdə gələcək iş fəaliyyətim
üçün konkret və real addımlar müəyyən etdim. Bu
gün tətbiqinə geniş yol açılmış innovasiyaların
təqdimatı mexanizmləri qaçılmaz reallıqlar
prizmasından və süzgəcindən keçirilir və
institutda vahid istiqamətdə məqsədli fəaliyyət
təhsil islahatının gələcək uğurlarından xəbər
verir.
İnstitutda müasir tələblərə cavab verən
maddi-texniki baza yaradılmış, əlavə təhsil üzrə
kabinetlər müasir tələblərə cavab verən texniki
vasitələrlə təchiz edilmişdir. Əksər
kabinetlərdə İKT avadanlıqları vardır.
Azərbaycan Müəllimlər İnstitutunda təhsilin
məzmununa, onun keyfiyyətinin artırılmasına daim
diqqət yetirilir. Əlavə təhsil üzrə
dinləyicilərin arzu və təklifləri sorğu
anketləri vasitələri ilə öyrənilir. Dinlədiyim
mühazirələrdə institutun geniş beynəlxalq
əlaqələri barədə məlumat aldım. Beynəlxalq
təhsil sisteminə inteqrasiya olunmaq üçün Fransa,
Almaniya, ABŞ, İngiltərə, Türkiyə, Rusiya ilə
əlaqələr yaradılıb və təcrübə mübadiləsi
aparılır, layihə və memorandumlar imzalanır.
İnstitutun Əlavə təhsil üzrə prorektoru Rahim
Əzizov, ixtisasartırma və yenidənhazırlanma
fakültəsinin dekanı, dosent Telman Haqverdiyev,
professor Ramiz Məmmədzadə, professor Sərdar
Quliyev, dosent Əsabəli Quliyev, dosent Rəşid
Cabbarov, dosent Atəş Abdullayev, dosent Sirac
Rəsulov, baş müəllim Firəngiz Kərimova təhsilin
idarə olunmasında müasir yanaşmaların aktual
problemlərinin təhlilini apararaq bizi
maraqlandıran sualları cavablandırdılar. Müasir
təlim texnologiyaları ilə məlumatlandıq və yeni
idarəetmə strategiyalarını öyrəndik.
İnstitutda təlim almağa gəlmiş müəllimlər üçün
çox rahat yataqxana və keyfiyyətli qidalarla
zəngin olan yeməkxana təşkil edilib.
Bütün yuxarıda qeyd olunanlara rəğmən mən
təcrübəli məktəb rəhbəri və müəllim kimi
Azərbaycan Müəllimlər İnstitutunun rəhbərliyinə,
professor-müəllim heyətinə, xüsusən institutun
rektoru, professor, millət vəkili Aqiyə xanım
Naxçıvanlıya bu nəcib və vacib işdə uğurlar
arzulayıram. Müəllimlər İnstitutu pedaqoji
işçilərin istinadgahı və məbədgahıdır.
Elmira QASIMOVA,
Quba şəhər 4 nömrəli humanitar fənlər təmayüllü
məktəb-liseyin direktoru |
|
