|
Əsası 2001-ci ildə qoyulmuş Heydər Əliyev adına
Müasir Təhsil Kompleksi Azərbaycanın özəl təhsil
müəssisələrindəndir. Kompleksin məqsədi milli
ruhda nümunəvi tərbiyə və təhsil sistemi
yaratmaqdır.
 Kompleksimiz
milli təhsil ənənələri ilə müasir təlim
texnologiyalarını özündə birləşdirir. Dərslər
həm ənənəvi formada, həm də mühazirə, diskussiya,
laborator məşğələlər, tədqiqatlar,
inkişafetdirici oyunlar, ekskursiyalar və s.
şəklində aparılır. Tədris prosesində daim
müxtəlif innovasiyalar tətbiq olunur.
Kompleksimizdə informasiya və kommunikasiya
texnologiyalarının tətbiqinə də mühüm yer
verilir.
Tədris ocağımız müxtəlif müasir İKT vasitələri -
kompüterlər, proyektorlar, interaktiv lövhələr
və digər interaktiv tədris vasitələri ilə tam
təmin olunmuşdur. 200-dən artıq kompüteri özündə
birləşdirən məktəb kompüter şəbəkəsi mövcuddur.
İnformatika fənninin tədrisinə çox böyük diqqət
yetirilir. Kompüterlə tanışlıq bağçada yuxarı
yaş qrupundan başlanılır. İnformatika fənninin
tədrisi isə artıq 1-ci sinifdən başlayaraq
aparılır. İbtidai siniflərdə informatika
fənninin tədrisi əyləncəli öyrədici kompüter
oyunları və məntiqi məsələlər vasitəsilə həyata
keçirilir. Yuxarı siniflərdə isə kompüterin
cihaz hissələri ilə tanışlıq, müxtəlif
istifadəçi proqramları və proqramlaşdırma
dilləri tədris olunur. Şagirdlərin bu biliklərə
tam yiyələnməsi üçün müəllimlər tərəfindən əlavə
dərslər və praktiki məşğələlər aparılır.
İnformatika fənninə marağı daha da artırmaq üçün
şagirdlər arasında müxtəlif yarış və müsabiqələr
keçirilir. O cümlədən, İKT sahəsində fəaliyyət
göstərən müxtəlif elmi institutlara və
istehsalat müəssisələrinə ekskursiyalar, bu
sahənin görkəmli nümayəndələri ilə görüşlər
təşkil edilir.
Uğurlarımız çoxdur. Son illər şagirdlərimiz bu
sahədə respublikamızda keçirilmiş bir çox
müsabiqə və yarışların, o cümlədən "Virtual rinq"
oyununun, Təhsil Nazirliyinin keçirdiyi
məktəblilər arasında "Gənc kompüter
istedadları" adlı I Respublika müsabiqəsinin
qalibləri olmuşlar.
Fənn müəllimləri tərəfindən tədris prosesində
İKT-dən geniş istifadə olunur. Müəllimlərimiz
tədris etdikləri fənlərə dair müxtəlif elektron
resurslar yaradır və dərs zamanı istifadə
edirlər. Bu da dərsin effektivliyinin
artırılmasında və daha yaxşı mənimsənilməsində
böyük rol oynayır. Təsadüfi deyil ki, keçən il
Təhsil Nazirliyinin keçirdiyi "Elektron təhsil"
müsabiqəsində kompleksimizin müəllim və
şagirdlərinin təqdim etdiyi işlərdən 4-ü
müsabiqənin qalibi olmuş, 3-ü isə müsabiqədə
fərqləndiyinə görə mükafata layiq görülmüşlər.
Elektron tədris vasitələrinin yaradılmasına da
kompleksimiz öz töhfəsini vermişdir.
Müəllimlərimiz tərəfindən kimya və həndəsə
fənlərindən interaktiv elektron dərsliklər
hazırlanaraq şagirdlərin istifadəsinə
verilmişdir (www.derslik.az).
Tədris prosesinin idarə olunmasında da İKT geniş
tətbiq olunur. Kompleksimizdə hazırlanmış
elektron idarəetmə sistemi elektron formada test
imtahanlarının keçirilməsi və tədris prosesi ilə
bağlı bir çox məsələlərin daha tez və çevik
həllini tapması üçün tətbiq olunur. Daha dəqiq
desək, bu sistem - test imtahanlarının tam
elektron formada keçirilməsinə, şagirdlərin
dərsə davamiyyəti və fənlərdən aldığı
qiymətlərin elektron formada qeydiyyatının
aparılması və emalına, kompleks kitabxanasının
elektron kataloqunun və kitabların elektron
formasının yaradılmasına imkan verir. Artıq 4
ildir ki, bu sistem kompleksimizdə uğurla tətbiq
olunur.
Kompleksin daim yenilənən İnternet saytı
fəaliyyət göstərir (www.mtk.edu.az). Saytımız
kompleks haqqında ətraflı məlumat verməklə və
kompleksimizin gündəlik həyatını işıqlandırmaqla
yanaşı, həmçinin valideynlə məktəb arasında
qarşılıqlı əlaqəni təmin edir. Belə ki,
valideynlər saytımıza daxil olaraq övladlarının
fənlərdən aldığı qiymətləri, onların imtahan
nəticələrini, müəllimlərin yazdığı qeydləri görə
bilər və öz arzu, istək və təkliflərini yaza
bilərlər.
Bu yaxınlarda müəllimlərimiz daha bir uğura imza
atmışlar. Kompleksimizin müəllimləri Əlinazim
Mahmudzadə və Rəna Əhmədova
"Microsoft-Azerbaijan" şirkətinin Təhsil
Nazirliyinin dəstəyi ilə keçirdiyi "İnnovativ
müəllimlər" müsabiqəsində "Vızıltılı
superkompüterlər" adlı layihə ilə uğurla çıxış
edərək respublikamızın 20 finalçı məktəbi
arasında birinci yerə layiq görülmüşlər.
Həmin layihə Azərbaycanı təmsil etmək üçün
21-24 mart tarixində Moskvada keçirilən 8-ci
Avropa Forumuna təqdim olunmuşdur. Bu forumda
Avropanın 44 ölkəsindən olan 285 iştirakçı
mübarizəyə qoşulmuşdu. Burada da müəllimlərimiz
uğurla çıxış edərək "Dərsdənkənar tədris
fəaliyyətləri" nominasiyasında 3-cü yerə layiq
görülmüş və bu ilin noyabrında ABŞ-ın Vaşinqton
şəhərində keçiriləcək Ümumdünya İnnovativ Təhsil
Forumunda Avropanı təmsil edəcək 24 müəllim
sırasına düşmüşlər.
Şübhəsiz ki, bütün bu uğurlarımız bizi çox
sevindirir və təhsilimizin daha da inkişaf
etməsi üçün şövq ilə çalışmağa ruhlandırır.
Ramil HƏSƏNOV,
Heydər Əliyev adına Müasir Təhsil Kompleksinin
İKT üzrə rəhbəri |
