|
Ankaradakı Qazi Universitetində tələbələr
arasında ən yaxşı pyes müsabiqəsinin yekunlarına
həsr olunmuş mərasim keçirilmişdir.
Azərbaycanın Türkiyədəki səfirliyinin
əməkdaşlarının da iştirak etdiyi mərasimdə
ermənilərin qətlə yetirdiyi türk diplomatlarının
xatirəsinə həsr olunmuş ən yaxşı səhnə
əsərlərinin müəlliflərinə mükafatlar təqdim
olunmuşdur.
Şəhid olmuş diplomatlardan Türkiyənin Fransadakı
səfiri İsmayıl Erezin həyatından bəhs edən "Göl,
kök və söyüd ağacı" tamaşasından sonra mərasimdə
çıxış edən Qazi Universitetinin professoru Hale
Şıvqın bildirmişdir ki, erməni məsələsi
Türkiyənin ən çətin problemlərindən biridir.
Ermənilərin "soyqırımı" iddialarının
qəbuledilməz olduğunu diqqətə çatdıran natiq
əlavə etmişdir ki, müsabiqənin əsas məqsədi
gənclərin bu məsələni dərindən öyrənməsidir.
Səfir Engin Lütem də çıxışında bu müsabiqənin
erməni terrorunun qurbanı olmuş diplomatların
xatirəsinin anılması və bu həqiqətlərin
unudulmaması baxımından əhəmiyyətini
vurğulamışdır.
Türkiyə parlamentinin sədri Sadık Yaqut
müsabiqənin qalibi olmuş tələbə Oğuz Şükrü Enerə
mükafatını təqdim etmişdir.
"Təpələrdən səs gəldi" pyesi ilə müsabiqənin
üçüncüsü olmuş tələbə Ayşənur Kılıcərə mükafatı
Azərbaycanın Türkiyədəki səfiri Faiq Bağırov
təqdim etmişdir. |
