|
Aprelin 21-də Bakı Dövlət Universitetində
Azərbaycanda ali jurnalistika təhsilinin
görkəmli təşkilatçısı, yazıçı-publisist Nurəddin
Babayevin anadan olmasının 90 illiyinə həsr
edilmiş tədbir keçirildi.
Tədbirdə N.Babayevin keçmiş tələbələri, ailə
üzvləri, tanınmış ziyalılar, alimlər,
universitetin professor-müəllim və tələbə
heyəti, eləcə də KİV təmsilçiləri iştirak
edirdilər.
BDU-nun rektoru, millət vəkili Abel Məhərrəmov
tədbiri açaraq iştirakçıları salamladı və dəvəti
qəbul edən qonaqlara təşəkkürünü bildirdi.
A.Məhərrəmov giriş sözündə jurnalistika
fakültəsinin ilk dekanı olmuş professor Nurəddin
Babayevin yaradıcılığının və pedaqoji
fəaliyyətinin gənclərin əxlaqının
formalaşmasında və Azərbaycanda istedadlı
jurnalist kadrlarının yetişməsində əhəmiyyətli
rolundan bəhs etdi.
Sonra jurnalistika fakültəsinin dekanı,
professor Yalçın Əlizadə "Professor Nurəddin
Babayevin elmi-pedaqoji və yaradıcılıq
fəaliyyəti" mövzusunda geniş məruzə etdi.
Görkəmli yazıçı-publisistin anadan olmasının 90
illiyinə həsr edilmiş xatirə günündə daha sonra
BDU-nun kafedra müdirləri, professorlar İzzət
Rüstəmov və Qulu Məhərrəmli, "Azərbaycan"
qəzetinin baş redaktoru, millət vəkili Bəxtiyar
Sadıqov, Azərbaycan Respublikası Milli Arxivlər
İdarəsinin müdiri Ataxan Paşayev, tarix elmləri
doktoru Solmaz Rüstəmova, "Gənc reportyorlar"
klubunun rəhbəri, jurnalistika fakültəsinin III
kurs tələbəsi Məhəmməd Ağayev, əməkdar jurnalist
Əlövsət Bəşirov və başqaları çıxış etdilər.
Xatirələrdə Nurəddin Babayevin şəxsi nümunəsi və
publisistik əsərləri ilə gənclərə yüksək mənəvi
keyfiyyətlər aşılamasından söz açıldı.
Çıxışlarda müasir tələbələrin onun adını və
ideyalarını yaşadacağına ümid ifadə olundu.
Hicran ƏKBƏROVA |
