|
Məlum olduğu kimi, bu il 8-19 aprel
tarixlərində Bakıda "İNEPO-AVRASİYA" Ətraf
Mühitin Mühafizəsi Beynəlxalq Layihə Olimpiadası
keçirildi. Yarışmaya 35 ölkənin məktəbli
komandaları tərəfindən İnternet vasitəsilə
400-dən çox layihə təqdim edilmiş, onlardan
115-i yarışmaya qəbul olunmuşdu. Olimpiadaya
təqdim olunan layihələr 4 əsas mövzu (ətraf
mühit, mühəndislik, enerji və sosiologiya)
üzərində qurulmuşdu. Həmin layihələrin 58-i
Azərbaycanın müxtəlif regionlarındakı təhsil
ocaqlarını, o cümlədən Bakı Slavyan Universiteti
Məktəb-Lisey Kompleksini təmsil edən müəllim və
şagirdlər tərəfindən hazırlanıb təqdim
edilmişdi.
 Bizim
təqdim etdiyimiz layihə "Uşaqdan-Uşağa Ekoloji
Şəbəkə" adlanırdı. Layihə beynəlxalq
olimpiadanın məqsədlərini özündə əks etdirən
aşağıdakı məsələləri əhatə edirdi: Uşaqların
artıq gənc yaşlarından dünyanın qlobal
problemlərindən biri - ekologiyanın çirklənməsi
probleminə inteqrasiyası, nəticədə onlarda
ekoloji tərbiyə və mədəniyyətinin yaranması və
inkişafı, həmin sahə üzrə maariflənməsi; sağlam
ətraf mühitin təmin edilməsi sahəsində dövlətin
öhdəliklərini əks etdirən Uşaq Hüquqları
Konvensiyasının müddəaları (maddə 24.2) üzrə
maariflənmə; ətraf mühitin çirklənməsi
nəticəsində baş verən fəlakətlər və törəyən
xəstəliklər haqqında məlumatlanma, nəticədə
sağlam həyat tərzi və yaşayış bacarıqlarına
yiyələnməyə istiqamətlənmə; ölkədə və
beynəlxalq müstəvidə sağlam ətraf mühitin
qorunması sahəsində həyata keçirilən tədbirlər
haqqında, bu sahədə fəaliyyət göstərən yerli və
beynəlxalq təşkilatlar barədə məlumatlanma;
şagirdlərdə araşdırma və təhliletmə bacarığının
yaranması və inkişafına kömək məqsədi ilə layihə
çərçivəsində onlar tərəfindən sosioloji sorğunun
aparılması və əldə olunan nəticələrin təhlili.
Layihə bu sətirlərin müəllifinin rəhbərliyi ilə
kompleksin VII və X sinif şagirdləri Leyla
Hacılı və Lalə Darcınova tərəfindən Heydər
Əliyev adına Əl Oyunları Sarayında nümayiş
etdirildi. Nümayiş zamanı iştirakçılara layihəni
əks etdirən bukletlər paylandı. Olimpiada
müddətində şagirdlərin ekologiyaya dair
hazırladıqları rəsm və əl işləri slaydlar
şəklində işıqlandırıldı, hazırlanmış stend və
maketlər böyük marağa səbəb oldu. Bununla
yanaşı, olimpiadanı təmsil edən hər ölkə
nümayəndəsi tərəfindən qurumuş ağaca yaşıl
yarpaqla birgə öz dövlətinin bayrağının
bərkidilməsi aksiyası təşkil olundu. Bu isə
onların hər birinin simvolik olaraq ətraf
mühitin yaşıllaşmasında iştirakını bir daha
vurğuladı.
Olimpiadada nümayiş etdirilən layihələr
iştirakçı ölkələrin təcrübəli elm adamlarından
ibarət münsiflər heyəti tərəfindən
qiymətləndirildi. Sonda qaliblər müxtəlif
nominasiyalar üzrə qızıl, gümüş və bürünc
medallarla təltif olundu. Qaliblər sırasında
Bakı Slavyan Universiteti Məktəb-Lisey Kompleksi
də vardır. Biz çox sevinirik ki, təqdim
etdiyimiz layihə ekspertlər tərəfindən yüksək
səviyyədə bəyənilmiş və "ətraf mühit"
nominasiyası üzrə qızıl medala layiq
görülmüşdür.
Gülnar RÜSTƏMOVA,
Bakı Slavyan Universiteti Məktəb-Lisey
Kompleksinin biologiya müəllimi |
