|
 Azərbaycan
Dillər Universitetində TEMPUS layihəsi
çərçivəsində "Azərbaycanda yazılı və şifahi
tərcümənin tədrisində islahatlar" mövzusunda
təlimlərə start verildi. TEMPUS proqramı
çərçivəsində keçirilən təlimlərdə ADU ilə
yanaşı, Naxçıvan Dövlət Universiteti, Lənkəran
Dövlət Universiteti, Gəncə Dövlət
Universitetinin əməkdaşları da iştirak ediblər.
Çıxışçılar ədəbi-bədii tərcümə, reklam
tərcüməsi, elmi əsərlərin tərcüməsi sahəsində
qarşıya çıxan çətinliklər, tərcümənin dəqiqliyi,
xarici və yerli tərcüməçilərin oxşar və fərqli
cəhətlərini, eləcə də ali təhsil müəssisələrində
tərcüməçilik ixtisasının tədrisi məsələlərini
müzakirə ediblər. Mövzular ətrafında geniş
fikir mübadiləsi aparılıb.
Xatırladaq ki, ADU-nun "Azərbaycanda şifahi və
yazılı tərcümənin tədrisində islahatlar" adlı
layihəsi Avropa Birliyinin TEMPUS IV, 3-cü
Çağırış üzrə elan etdiyi müsabiqədə qalib
gəlmişdir. Sözügedən layihənin seçilməsi
Azərbaycan təhsil sisteminin böyük nailiyyəti
kimi qeyd olunmalıdır. Bu, Azərbaycandan olan
universitetin Avropa Birliyi layihəsində ilk
idarəçiliyi və Avropa universitetlərinin
Azərbaycan tərəfindən ilk koordinasiyası
olacaqdır. Layihənin məqsədi Boloniya prosesinin
tələblərini nəzərə almaqla Azərbaycanda
tərcümənin tədrisində islahatlar aparmaq, tədris
planlarını, tədris və təlim prosesini daha da
təkmilləşdirməkdir.
Şakir CƏFƏROV |
|
