|
 Təhsil
Nazirliyinin 1 aprel 2011-ci il tarixli əmrinə
əsasən Bakı Pedaqoji Kadrların İxtisasartırma və
Yenidənhazırlanma İnstitutunun nümayəndə heyəti
11-16 aprel tarixlərində Ukraynada səfərdə
olmuşdur. Səfərdən məqsəd Ukrayna Təhsil
Menecmenti Universiteti, Kiyev Vilayət Pedaqoji
Kadrların Diplomdansonrakı Təhsil İnstitutu,
İnformasiya Texnologiyaları İnstitutu, Bakı
Pedaqoji Kadrların İxtisasartırma və
Yenidənhazırlanma İnstitutu, Moskva Vilayət
Diplomdansonrakı Təhsil Pedaqoji Akademiyası və
ABŞ-ın San-Dieqo Milli Universitetinin birgə
təşkilatçılığı ilə 14-15 apreldə keçirilən
"İnnovativ təhsil fəaliyyəti: regional
aspektlər" beynəlxalq elmi-praktik konfransını
təşkil etmək idi. Son üç ildə BPKİYİ-nin
təşkilatçılığı ilə Azərbaycanda və Ukraynada
keçirilən sayca IV beynəlxalq elmi konfransda
adıçəkilən ölkələrin ali məktəblərinin və
elmi-tədqiqat institutlarının yüksək ixtisaslı
mütəxəssisləri dörd bölmədə - təhsildə innovativ
proseslər və onların regional aspektləri,
diplomdansonrakı pedaqoji təhsil şəraitində
pedaqoqların innovativ fəaliyyətə hazırlanması,
informasiya-tədris mühiti təhsildə qlobal və
regional inteqrasiya vasitəsi kimi, ali və orta
təhsil müəssisələrində innovativ fəaliyyətin və
təcrübi-eksperimental işlərin idarə edilməsi
bölmələrində məruzələrlə çıxış etmişlər.
Təhsilin inkişafının mühüm problemlərinin
həllinə yönəldilmiş maraqlı məruzələrlə zəngin
olan beynəlxalq konfransda fizika-riyaziyyat
elmləri doktoru, professor Asəf Zamanov
"Azərbaycanın orta təhsil sahəsində innovativ
islahatların əsas istiqamətləri", pedaqoji
elmlər üzrə fəlsəfə doktoru Polad Mədədov
"Qloballaşma şəraitində elm və təhsilin
inteqrasiyası" mövzularında məruzə etmişlər.
Konfransın materiallarında Azərbaycanın, o
cümlədən BPKİYİ-nin yüksək ixtisaslı
mütəxəssislərinin 12 elmi əsəri dərc edilmişdir.
Qeyd etmək yerinə düşər ki, son üç ildə
BPKİYİ-nin əsas təşkilatçılığı ilə dörd
beynəlxalq elmi konfrans keçirilmişdir: 1)
"Qloballaşma şəraitində pedaqoji kadrların
ixtisasının artırılması: reallıqlar və
perspektivlər" (Azərbaycan, Bakı, noyabr 2008);
2) "Diplomdansonrakı pedaqoji təhsil: Avropa
oriyentirləri və regional prioritetlər"
(Ukrayna, Belaya Çerkov, sentyabr 2009);
3)"İnnovasiya, təhsilin keyfiyyəti və inkişaf"
(Azərbaycan, Bakı, noyabr 2010); 4) "İnnovativ
təhsil fəaliyyəti: regional aspektlər" (Ukrayna,
Belaya Çerkov, aprel 2011). Beynəlxalq
konfransların hər birinin materialları yüksək
poliqrafik və elmi səviyyədə dərc edilmişdir.
Səfər zamanı beynəlxalq konfransda iştirak edən
müvafiq ali məktəblərin rəhbərlikləri ilə
gələcək əməkdaşlığa dair məsələlər də müzakirə
edilmişdir. Həmçinin, Ukrayna Təhsil Menecmenti
Universiteti ilə Bakı Pedaqoji Kadrların
İxtisasartırma və Yenidənhazırlanma İnstitutu
arasında elm və təhsil sahəsində əməkdaşlığa
dair müqavilə imzalanmışdır. Təhsil işçilərinin
ixtisasının artırılması və yenidənhazırlanması,
professional hazırlığının elmi-metodik
müşayiəti, ixtisasartırma və yenidənhazırlanma
kurslarının qarşılıqlı fəaliyyət sistemi ilə
tanışlıq, ixtisasartırma və yenidənhazırlanma
üzrə proqram mübadiləsi və onların
qiymətləndirilməsi, distant təlim kurslarının
birgə işlənməsi, kurs müdavimləri və tələbələr
üçün birgə məşğələlərin keçirilməsi,
elmi-tədqiqat fəaliyyətində birgə iştirak,
seminar və mühazirələrin keçirilməsi üçün
professor-müəllim heyətinin mübadiləsi, iş
təcrübəsini öyrənmək və innovativ layihələrin
hazırlanması məqsədilə pedaqoji və rəhbər işçi
qruplarının mübadiləsi, beynəlxalq təhsil
layihələrində birgə iştirak, birgə regional və
beynəlxalq elmi-praktik simpoziumların,
konfransların, seminarların, treninqlərin
keçirilməsi, nəşriyyat məhsullarının mübadiləsi
məqsədi daşıyan müqaviləni universitetin
rektoru, akademik V.V.Oleynik və BPKİYİ-nin
rektoru, professor A.Zamanov imzalamışlar.
Adıçəkilən müqavilə BPKİYİ və xarici ölkələrin
müvafiq ali məktəbləri arasında imzalanmış sayca
12-ci sənəddir. Belə ki, 2008-ci ildən
başlayaraq Belarus, Qazaxıstan, Fransa, Latviya,
Rusiya və Ukraynanın 12 ali məktəbi ilə elm və
təhsil sahəsində əməkdaşlığa dair müqavilələr
imzalanmış, müvafiq işlər görülmüşdür. Yuxarıda
adları göstərilən beynəlxalq konfranslar,
həmçinin ali məktəblərin professor-müəllim
heyətinin təcrübə mübadilələrinin reallaşması da
bu müqavilələr əsasında həyata keçirilmişdir.
Sonda onu da qeyd edək ki, nümayəndə heyətinin
rəhbəri, professor A.Zamanov səfər zamanı onlara
göstərdiyi yüksək diqqətə görə ölkəmizin
Ukraynadakı fövqəladə və səlahiyyətli səfiri
cənab Eynulla Mədətliyə qəzetimizin vasitəsilə
minnətdarlığını bildirir.
Hicran ƏKBƏROVA |
|
