|
Aprelin 15-də Azərbaycan Dövlət Pedaqoji
Universitetində ümummilli liderimiz Heydər
Əliyevin anadan olmasının 88-ci ildönümünə həsr
olunmuş "Boloniya prosesində ali təhsildə
keyfiyyətin idarə olunması" mövzusunda
beynəlxalq elmi konfrans keçirildi.
 Azərbaycan
Respublikasının Təhsil Nazirliyi, Azərbaycan
Dövlət Pedaqoji Universiteti və Qafqaz
Universitetinin birgə təşkilatçılığı ilə
keçirilən tədbirdə nazirliyin Mərkəzi
Aparatının, müvafiq şöbə və struktur
bölmələrinin rəhbərləri, ölkəmizdə fəaliyyət
göstərən ali məktəblərin nümayəndələri, tanınmış
alimlər, müəllimlər, tələbələr və KİV
təmsilçiləri iştirak edirdilər.
Azərbaycan Respublikasının təhsil naziri Misir
Mərdanov tədbiri açaraq iştirakçıları salamladı
və türkiyəli qonaqları onlara təqdim etdi. Bu
konfransın ADPU və Qafqaz Universitetinin
təşəbbüsü ilə keçirilməsinin təsadüfi olmadığını
vurğulayan təhsil naziri bildirdi ki, son illər
bu universitetlərdə təhsilin keyfiyyətinin
yüksəldilməsi ilə bağlı konkret işlər görülmüş,
tədris prosesində informasiya texnologiyalarının
tətbiqi, şəffaflığın təmin edilməsi
istiqamətində müsbət nəticələr əldə edilmişdir.
Professor Misir Mərdanov giriş sözündə qeyd etdi
ki, ölkəmizdə ali təhsil sistemində aparılan
islahatların əsas məqsədi ali təhsilin Avropa
təhsil məkanına inteqrasiyası, onun məzmununun
Boloniya prosesi prinsiplərinə uyğun qurulması,
informasiya cəmiyyətinin və biliklərə əsaslanan
iqtisadiyyatın tələblərinə uyğun kadr
potensialının yaradılması, keyfiyyətli və
səmərəli ali təhsil sisteminin
formalaşdırılması, əhalinin müasir tələblərə
cavab verən ali təhsil almaq imkanlarının
genişləndirilməsi, ali təhsil müəssisələrinin
akkreditasiyasının təkmilləşdirilməsi, bu
prosesə beynəlxalq ekspertlərin cəlb edilməsini
təmin etməkdən ibarətdir. Bununla bağlı ali
təhsildə keyfiyyətin təmin olunması
istiqamətində həyata keçirilən islahatlar
Boloniya Bəyannaməsinin tələblərinə uyğun
aparılmalıdır. Ali təhsilimizin Boloniya prosesi
ruhunda yenidən formalaşdırılması üzrə konkret
addımlar Təhsil Nazirliyi və digər aidiyyəti
idarəetmə orqanları ilə yanaşı, ən çox
universitetlərin özlərinin işi, onların
təşəbbüsü və yaradıcılığının məhsulu olmalıdır.
Boloniya prosesi tələbləri səviyyəsində
fəaliyyət göstərmək istəyən universitetdə bu gün
ali təhsildə keyfiyyətin idarə edilməsi
sisteminin yaradılmaqda olduğunu deyən nazir
bildirdi ki, bu sistemin formalaşması və tətbiqi
universitetin bütün struktur bölmələrinin öz
işini yeni standartlar səviyyəsində qurmasını
tələb edir. Müasir ali təhsil müəssisəsinin
keyfiyyət sahəsində siyasətinin əsas məqsədi
şəxsiyyətin, cəmiyyətin, dövlətin, universitetin
bugünkü və perspektiv tələblərinə uyğun olaraq
innovativ, yüksək ixtisaslı pedaqoji, elmi,
idarəçi və s. kadrların hazırlanmasından ibarət
olmalıdır.
Keyfiyyətin idarə olunması təhsil prosesinin
nəticələrinin mərhələlərlə müşahidə edilməsi
(monitorinqi), bununla da hər bir mərhələdə
qarşıya qoyulmuş vəzifələrin optimal yerinə
yetirilməsi səviyyəsinin aşkarlanması vasitəsilə
həyata keçirilir.
Monitorinq müasir idarəetmə sistemində ən mühüm
sahələrdən biridir. Monitorinq vasitəsilə
universitetin fəaliyyətinin faktiki nəticələri
və onların son məqsədlərə uyğunluğu təhlil
olunur. Fəaliyyət prosesində yol verilmiş
kənaraçıxmaların dərəcəsi, istiqaməti və
səbəbinin düzgün müəyyənləşdirilməsi təmin
edilir.
Bütün hallarda təhsilin keyfiyyətinin
monitorinqi təhsilin keyfiyyətinin idarə
olunması ilə nəticələnir, çünki hər iki proses
universitet səviyyəsində sistemli və müntəzəm
şəkildə müvafiq məlumatların toplanmasını
nəzərdə tutur.
Təhsil naziri Misir Mərdanov çıxışının sonunda
bu tədbirin böyük əhəmiyyət kəsb etdiyini
bildirdi və konfransın işinə uğurlar arzuladı.
Daha sonra tədbirdə Türkiyə Cümhuriyyəti Yüksək
Öyrətim Kurulunun (YÖK) icraçı heyətinin üzvü
Şaban Çalış, Mərmərə Universitetinin rektoru
Zafer Gül, Sakarya Universitetinin rektoru
Muzaffer Elmas, Azərbaycan Tibb Universitetinin
rektoru Əhliman Əmiraslanov və Türkiyənin
Azərbaycandakı səfirliyinin nümayəndəsi Kaya
Bakkalbaşı çıxış etdilər. Tədbirin sonunda
türkiyəli qonaqlara plaketlər təqdim olundu.
Bununla da konfransın plenar iclası başa çatdı.
Hicran ƏKBƏROVA |
