|
 Təhsil
Nazirliyindən aldığımız məlumata görə, cari
tədris ilinin sonunda ümumi təhsili xüsusi
nailiyyətlərlə başa vuran məzunlara qızıl və
gümüş medallar təqdim olunacaq. Məlumat üçün
bildirək ki, ümumi təhsili xüsusi nailiyyətlərlə
başa vuran məzunların qızıl və ya gümüş medalla
təltif olunması qaydası Azərbaycan Respublikası
Nazirlər Kabinetinin xüsusi qərarı ilə hələ ötən
ilin əvvəlində təsdiq olunub. Bu günlərdə isə
hökumət "Təhsildə xüsusi nailiyyətlərə görə"
qızıl və gümüş medalların təsvirini təsdiq edib.
Qaydaya əsasən qızıl və ya gümüş medalla
ümumtəhsil məktəbində təhsil aldığı müddətdə
təlim nəticələri və nümunəvi davranışı ilə
fərqlənən tam orta təhsil səviyyəsinin məzunları
təltif olunurlar. Namizədlər irəli sürülərkən
təhsilalanın ümumi orta təhsil səviyyəsini 75
faiz "əla" qiymətlərlə bitirməsi, tam orta
təhsil səviyyəsində oxuduğu müddətdə fənlər üzrə
cari qiymətlərinin ən azı 75 faizinin, bütün
fənlərdən illik qiymətlərinin isə "əla" olması
və nümunəvi davranışı ilə fərqlənməsi əsas
götürülür.
Namizədliyin verilməsi zamanı habelə
təhsilalanın respublika fənn olimpiadalarının
yekun mərhələsində, rayon (şəhər), ölkə və
beynəlxalq səviyyəli bilik yarışlarında,
müsabiqə və layihələrdə mükafata layiq görülməsi
də nəzərə alınır.
 Təhsilalanların
qızıl və ya gümüş medalla təltifi üçün
namizədliyin verilməsi məsələsinə sinif
rəhbərinin təqdimatı əsasında məktəbin pedaqoji
şurasında baxılır və müvafiq qərar qəbul edilir.
Onu da qeyd edək ki, namizədliyi verilmiş
təhsilalanlardan attestata yazılan yekun
qiymətləri yalnız "əla" olanlar qızıl medala,
attestata yazılan yekun qiymətlərindən ən çoxu
ikisi "yaxşı" (tədris dili və riyaziyyat istisna
edilməklə) olanlar isə gümüş medala layiq
görülürlər. Qızıl və gümüş medal almış
məzunların adları oxuduqları məktəbin "Şərəf
kitabı"na yazılır.
Ölkə üzrə medallara namizədliyi irəli
sürülənlərin fərdi siyahısının Təhsil
Nazirliyinə təqdim olunma müddətinin sonuna -
mayın 20-ə hələ xeyli vaxt qalsa da, Bakı şəhəri
üzrə belələrinin sayı artıq məlumdur. Belə ki,
bu il paytaxtın ümumtəhsil müəssisələrində tam
orta təhsil səviyyəsi üzrə məzun olacaq 27 nəfər
qızıl və gümüş medallara namizəddir. Həmin
şagirdlər iyunda keçiriləcək mərkəzləşdirilmiş
buraxılış imtahanlarından yüksək qiymətlər
alsalar, medallara sahib olacaqlar.
Y.ƏLİYEV |
